SKŁADNIKI:

• mlyko nojlepij od gospodorza (idzie spróbować ze sklepowego ale niepasteryzowanego we bojtlu)
• gaza tako ze aptyki abo pielucha tetrowo
• durszlak ze małymi łoczkami abo jakie inksze cedzitko
• forymka do syra (ewyntualnie)

JAK ZROBIĆ?

1. Mlyko przelywomy do garca, nojlepij szyrokigo a niskigo i łostawiomy w ciepłym miejscu. (Jak je takie łod gospodorza to na drugi dziyń zbiyromy z niego śmietonka). Czekomy tak ze 3-4 dni aż mlyko sie zsiednie (wszysko zależy łod ciepła jakie momy w chałpach-czym cieplij tym pryndzyj mlyko bydzie zsiedniynte)
2. Po tym czasie stawiomy garniec na nojmniyjszym palniku. Poleku podgrzywomy aż bydzie ciepłe. Jak mocie do dyspozycji termomyjter taki do wyndzynio abo do szynkowaru to połóżcie go na som wiyrch, delikatnie wroźcie do mlyka na maksymalnie pół cynta. Tympyratura na wiyrchu mo być niy wiynkszo jak 40 stopni.
3. Absolutnie niy zaworzcie tego mlyka bez to trza go wahować.
   
4. Jak mlyko bydzie ciepłe wyłonczyć palnik. Mlyko powinno wyglondać jak zsiadłe pływajonce we żółtej serwatce.
   
5. Zostawiomy go do całkowitego wystygniyńcio. Jak bydziecie mlyko grzoć rano to syr bydziecie robić na wieczór a jak we wieczór to nojlepij dopiyro rano.
6. Rychtujymy garniec, cedzitko i do jego środko wrażujymy gaza abo pielucha.
   
7. Łyżkom cedzakowom delikatnie zbiyromy skrzepy mlyka i wciepujymy na sito.
   
8. Zostawiomy na pora godzin do okapniyńcio. Po tym czasie leko odciskomy i przeciepujymy do forymki (jak mocie) abo gaza zawionzujymy na ciasno i tak łostawiomy.
   
9. Jak chcecie coby syr mioł bardzi zwarto konsystyncjo to idzie go leko obcionżyć np garcym z wodom. No i zostawiomy na kilka godzin w chłodnym miejscu.

WSKAZÓWKA: ze 1,5l mlyka wyłazi jakies 300g syra